فتاة إلتحقت بالوسط الإعلامي في السنوات الأخيرة الماضية، صوتها المخملي ووجها البريء كانا جواز عبورها لهذا المجال، عرفت بحضورها القوي، كتبت عدة مواقع عن مسيرتها الإعلامية، فأثارت ضجة وكان لها صدى حيث تميزت بكتاباتها الجريئة، وإنتقائها لكل ما هو مهم، وإهتمامها بحقوق الإنسان ومناصرتها للمرأة ومشاركتها في الفعاليات الوطنية، وكانت من اوائل المبادرين لكل ما يمكن ان ينهض بالمجتمع، وقطعت على نفسها عهدآ بأن لا تسكت عن الظلم، فهل ستصبح سفيرة للإنسانية ، براء العوري في حوار خاص مع موقع دولة فلسطين وتجيب عن علامات الإستفهام، وفيما يلي نص الحوار…
س. عرفي عن نفسك في سطرين؟
براء عماد العوري خريجة صحافة وإعلام وبشتغل مذيعة وبكتب مقالات وخواطر، أنا إنسانة عادية جدآ جدآ جدآ، ومن عائلة بسيطة.
س. ليش إختارتي الإعلام ؟ فيه تخصصات كتيرة غيره ؟
الإعلام كان رغبة والدي قبل ما يكون رغبتي، الإعلام حلمي وهوايتي منذ الطفولة والحمد لله وصلت إلى طموحي.
س. مين الأشخاص يلي شجعوكي ودعموكي ؟
أولآ بفضل ربنا التوفيق والنجاح، ثانيآ والدتي هي يلي دعمتني ماديآ لأدرس تخصصي مع إنها كانت تعارض الإعلام لإنو متعب وخطر للبنت من وجهة نظرها وحاولت تبعدني عنو لكن أنا رفضت وبإصراري لا زلت في مجالي، وللأسف عانيت وتعبت في بداية الطريق وإتحديت ولا زلت أتحدى وأصعب شي الإنسان بواجهو الغيرة والحسد ولأي درجة ممكن يوصل مستوى الحقد وشو ممكن يأثر عليه سلبيآ.
س. أكتر من موقع إخباري كتبو عنك، بعضهم حكو عنك موهبة شابة، والبعض الآخر خمنو إنو ممكن تصيري من أكثر الإعلاميات تأثيرآ في الوطن العربي، شو رأيك ؟
صحيح كتير مواقع تابعتني لفترة وإهتموا بيلي بنزلوا، أنا مبسوطة لإنو عم أترك أثر ورسالتي بتوصل، أنا ما بطمح للشهرة أنا عم قوم في واجبي فقط، وبتمنى أقدر أخدم بلدي وشعبي وأكون على قد المسؤولية.
س.بتفكري بيوم من الأيام تتركي الإعلام ؟
الإعلام كل حياتي، بتخلى عنو في حالة وحدة فقط إذا خيروني بين مهنتي وإنسانيتي وبلا تردد بختار الإنسانية.
س. بإعتبارك إعلامية محجبة، هل كان الحجاب نقطة ضعف لك ؟
ممكن فيه إعلاميات بعتبروه نقطة ضعف لكن أنا بكل فخر بعتبره مصدر قوة لي وما بتنازل عنو، وللأسف الإعلام العربي وخاصة المرئي بنبذ الإعلامية المححبة حتى لو كانت كفاءة وخبرة إلخ…..
س. مررتي بحالات إحباط ؟
أكتر من مرة وكنت ما الاقي حد جنبي إلا ربنا ما إتخلى عني والحمد لله ما يئست ربنا دايمآ معي ودايمآ بقول أنا فتاة لم تخلق لكي تهزم.
س. أكثر شخصيات متأثرة فيهن ؟
القائد الرمز ياسر عرفات، نيلسون مانديلا، المهاتما غاندي، محمود درويش، الفنانة أحلام ” الملكة “.
س. برنامج تلفزيوني ترغبي ان تكوني ضيفته ؟
برنامج رامز جلال لإني بحب نوعية برامجه الرعب والمغامرة، وبرنامج كلام نواعم، وبرنامج فحص شامل مع راغدة شلهوب.
س. شو حلم براء العوري ؟
أنا احلامي كتيرة وكل ما أحقق حلم بحدد حلم تاني لأوصله وهكذا…
س. أكثر صفة محببة إلك ؟
التواضع والبساطة.
س. وأكثر صفة بتكرهيها ؟
الظلم والنكد.
س. مين الشخص المقرب إلك وبتلجئي له ؟
انا إنسانة إجتماعية كتير لكن بفضل أكون صديقة نفسي، لإنو ما في حد مخلص بالنهاية بخذلوك أو برحلوا ببساطة.
س. مقولة أو حكمة مفضلة لك ؟
مهما كنت مثاليآ ستجد من يكرهك حتى الملائكة تكرهها الشياطين.
س. شو هواياتك ؟
الغناء والكتابة والمطالعة والنسيج.
س. شو نوع المكان يلي بترتاحي فيه ؟
الجبل بفرغ فيه طاقتي السلبية وبرتاح كتير.
س. هل ممكن تخوضي تجربة التمثيل إذا سمحتلك الفرصة ؟
إذا كان دراما بتعلق بشي وطني أو وثائقي ما بمانع.
س. إذا شخص إنتقدك شو ردة فعلك ؟
بتقبل النقد البناء من أشخاص صادقين بكل فرح، لكن إذا كان النقد إلو دافع تاني بكون موقفي مختلف.
س. لو يصحلك عرض شغل ممتاز بس تسافري خارج فلسطين بتوافقي ؟
فعليآ صحلي اكتر من فرصة ورفضتها ورح أتمسك في بلدي، هاي فلسطين ما في أغلى منها.
س. نصيحتك ل الصبايا ؟
بحب أحكي لكل بنت إنها تكون حلم كل رجل مش يكون حلمها رجل، لإنو ما بتعرف الزمن شو مخبيلها والمجتمع ما برحم البنت بشكل عام لكنه بحترم البنت المثقفة والقوية، لهيك ما تكوني تابع للرجل، كوني طموحة لإنو من حقك تحلمي.
س. كلمة أخيرة لك ؟
كل إنسان فينا بداخلو فيه قوة خير وكل إنسان فينا المفروض يقوم بواجبو تجاه غيرو ووطنو عشان تكون حياتنا أفضل وأجمل، رسالتي رسالة محبة وسلام، بدي من الجميع ينتبهوا على يلي بصير في الوطن العربي إنقذوا تاريخنا وحضارتنا قبل ما يفوت الأوان صح أنا فلسطينية لكن أنا عربية وإنتمائي ل فلسطين نفس إنتمائي لسوريا وما بقل عن لبنان وبعشق المغرب العربي وكل البلدان العربية وهيك لازم إحنا نكون، أنا وإنت وهي وهو وهم وإحنا كلنا لازم نحط إيدينا في إيدين بعض، وقريبآ رح يكون فيه عدة أعمال بتمنى من ربنا يوفقني ويكون معي، وشكرآ دمتم بخير.
دولة فلسطين
