على خلفية قرار حماس بتوزيع الأراضي الحكومية في غزة على موظفي حكومتها السابقة بدل مستحقاتهم المالية.
القيادي في حماس زياد الظاظا .. اتوكل على الله ووزع الأرض، وينعن راس أبو الزعلان بس في سؤال أخو شلن محيرني، بعد توزيع الأرض، راح تتراكم الرواتب مرة تانية، شو حتوزعوا عليهم حينها ؟!
في رجاء عندي وإنتا بتوزع خد في بالك : في 150 ألف عامل من 10 سنوات وهو ماكلين زفت خليلهم كم دونم على جنب.
وفي عندك كمان 130 ألف خريج جامعة، خليلهم بالله شوية أرض، بيقولوا أرض نتساريم منيحة.
وما تنسى بالله أهل الشهداء اللي ماتوا بالحروب ولليوم ما بياخدوا مستحقاتهم، تقريبا بيطلع عددهم 5000، شوف شو بيضل وزبطتهم بيضلهم غلابا.
وكمان بالله في عندك آلاف الناس والعائلات عايشين بغرفة ولا غرفتين، هدول بس جاهزين للموت والتضحية غير هيك ملهمش ولا حاجة، شوفلهم بالله أي فتفوتة أرض خليهم يتوسعه لأنه وضعهم صعب جدن .. جدن بالنون أي على الحديدة.
بس بدي أقلك، ما حد راح يمنعك من توزيع الأرض اللي راح تشتروها إنتو بعد هيك، وتتملكوها، بس الله يسامحكم مش قد السياسة والوظايف والقبضة ما كان شو بدكم في الهم هاد.
لكن ما حدا بيقدر يمنعك ولا حتى انك تشحط أكبر راس في غزة وتكسره، بس هي كلمة زغنونة: بكرا لما توزع الأرض هاد على اللي بدك اياهم، مش حتلاقي حدا يحمي هاي الارض، لانها صارت ملكية خاصة، لما الوطن يتقسم على الناس، بيبطل وطن بيصير حاكورة، وكل واحد بيدافع عن حاكورته، والغلابا اللي مطحونة محدش مدور عليهم، تتوقعش بكرا انك تطلع تخطب فيهم عن مقومات الصمود .. لأنه الناس فهمت الطبخة .. المهم خليلك كم دونم للناس اللي حتموت عشان غيرها اتعيش، لحسن منلقيش مكان ندفنهم.
